පන්දාහා ( නිසඳැස් )

සෙත්මිණි දිලේකා
ශාස්ත්‍ර පීඨය
කොලඹ විශ්වවිද්‍යාලය

මහත්තයෝ,

මතකද මං සුජාතා

ආදරේ නාමයෙන් විස්වාසෙ තියාගෙන

උඹැහැ එක්කල ආපු සුජාතා

ටවුමෙ මුල්ලක තිබුණු

නැන්සිගේ මඩමට

පන්දාහෙ හිලවුවට විකුණාපු සුජාතා

අවුරුදුම කීයක්ද

හැඩරුවත් වෙනස් දැන්

සුදු රෙද්ද පොරවලා

පන්සලට වෙන්න ඇති

යන්නෙ ඔය

පවුලෙ අය එක්කලා

සුදෝ සුදු මල් වට්ටි අත දරා

නිවන  නම් මට බොහෝ දුර ඇති

බලද්දී කරපු පවු එක්කලා

මහත්තය එහෙ ගො⁣හින්

පන්දාහ එවනවද

අඩුතරමෙ යන්න මේ අපායෙන් ගැලවිලා

මේ තිත්ත ජීවිතේ ඇතිවෙලා