බම්බුවෙ සහෝදරයා ( පද්‍ය)

චන්දිම සුපුන් 
නීති පීඨය
කොළඹ විශ්වවිද්‍යාලය

 ගිනි අව්වේ කජු බදින 

මාවෙතට පැමිණි

බම්බුවේ සහෝදරයා

හිස්කබල ගලවා

මොළය ඉවතට ගෙන

මිටියයි දෑකැත්තයි හොවා

කජු මිටක්වත් නොගෙනම

යන්නට ගියේය.

ටික දිනකට පසු

නූල් බැන්දත් 

සනීප නොවෙන තරමට

මගෙන් කජු කෑ මහත්වරු 

හීනෙන්විත්

මා නසන්නට විය.

සොය සොයා

කොටන්නට විය.

හිස්කබල නැතිව

මගමග ගමන් ගත්

පැරණි මිතුරෙකු 

මගේ මේ අමුතු ලෙඩට

වෙදදුරෙක් රෙකමදාරු කොට

අරගලයට ජයපතා 

යන්නට ගියේය.

පසුදින උදෑසන

ලෙඩය ගැන 

විස්තර විචාරයක් ද 

කල්තියා සූදානම් කොට ,

මිතුරා ලබාදුන් ලිපිනයට ගොස්

මම

දොරට තට්ටුවක් දැම්මෙමි.

අන්දුන් කුන්දුන් වුණෙමි...

බයිනෙත්තු ඩිස්පැන්සරියක 

මේස කබලක් ඉදිරිපිට 

බම්බුවේ සහෝදරයා 

වාඩිවී සිටියේය.